Siglir tar il cuntegn

Header

cuntegn

Exteriur Furmar nova regenza en Svezia vegn difficil

Suenter las elecziuns parlamentaras en la Svezia ha il primminister socialdemocratic, Stefan Löfven, envidà l'opposiziun a discurs.

Uss saja cler che nagina partida haja cuntanschì la maioritad en las elecziuns parlamentaras. Perquai saja normal d'avair ina collavuraziun sur ils blocs, ha ditg Löfven davant ses aderents. Cunquai ch’omadus blocs, cotschen-verd e conservativs, n'han cuntanschì ina maioritad vegn spetgà ina furmaziun da regenza difficila. Per il bloc conservativ na vegn ina coaliziun cun ils populists da la dretga dentant betg en dumonda.

Gudagnà las elecziuns, dentant tuttina ina terrada

Suenter avair dumbrà bunamain tut las vuschs vegnan ils socialdemocrats sin 28,4%, ils conservativs sin 19,8% ed ils extremists da dretga, ils uschenumnads «Democrats Svedais» (SD) vegnan sin 17,6% da las vuschs. Ils «Democrats Svedais» valan sco gronds victurs da las elecziuns parlamentaras. Quai sin donn e cust dals socialdemocrats ch'han bain gudagnà las elecziuns, quai dentant cun il mender resultat dapi 100 onns.

Radund 7,5 milliuns Svedais èn stads clamads a l'urna per eleger ils 349 deputads en il parlament.

RR novitads 06:00

Artitgels legids il pli savens