Siglir tar il cuntegn

Header

cuntegn

Exteriur Galaxy Note 7 è istorgia – Samsung sbassa prognosas

Samsung terminescha immediat la producziun da ses smartphone problematic. Quai suenter che plirs accus han brischà. En consequenza quinta il concern sidcorean cun damain gudogn.

Il model Galaxy Note 7 na vegnia betg pli producì. Quai ha communitgà in pledader dal concern da tecnologia sidcorean. Il smartphone era pir vegnì lantschà l’avust 2016 ed avess duì far concurrenza a l’iPhone dad Apple. L’entschatta da settember aveva Samsung annunzià da barattar tut ils 2,5 milliuns smartphones pertutgads ch’èn vegnids distribuids sin l’entir mund. Quai sco reacziun sin divers rapports ch’i dettia problems cun l’accu dal Galaxy Note 7.

Telefonin ars.
Legenda: In Galaxy Note 7 ch'ha piglià fieu. Reuters

Aczia da Samsung perda massivamain

La bursa ha reagì ferm sin quest svilup. L’aczia da Samsung Electronics ha pers passa 7%. La raschun per ils problems cun il Galaxy Note 7 n’èn anc betg clers.

Tenor indicaziuns da l’uffizi american per la protecziun da consuments pudessi esser pussaivel che l’accu saja in zic memia grond per la chascha dal smartphone e chaschunia uschia strasarsas en las battarias tar la montascha. Samsung aveva oriundamain planisà da lantschar la vendita dal Galaxy Note 7 ils 28 d’october 2016 en l’Europa.

Samsung sbassa prognosas

Pervi da la crisa dal telefonin Galaxy Note 7 quinta il concern Samsung gia la stad cun damain gudogn. Il terz quartal pudess il concern sidcorean far in gudogn da 4,5 milliardas francs, quai èn dus terzs da quai che Samsung ha incassà l'ultim temp. Era la svieuta pudess esser per radund 40 milliardas francs pli bassa che quintà.

RR novitads 12:00

Artitgels legids il pli savens