Siglir tar il cuntegn
cuntegn

Exteriur GB fa responsabel Russia per attatgas da cyber

Il servetsch secret militar da la Russia è responsabel per pliras attatgas sin stadis ed instituziuns dal vest durant ils ultims onns, uschia la renfatscha da la regenza britannica.

Purtret d'in maun che scriva vid ina tastatura d'in computer.
Legenda: La Russia saja responsabla per pliras attatgas da cyber dals ultims onns. Keystone

En in studi che sa basa sin indicaziuns dal center naziunal per la segirezza da cyber NCSC, vegn il servetsch secret da la Russia descrit sco attatgader en l’internet. El haja la finamira da semnar discordia en il mund. Tranter auter fa la Gronda Britannia responsabel il servetsch secret russ per l’attatga da hacker «Bad Rabbit» e sin l’agentura d’antidoping mundiala «WADA» il 2017. Plinavant er per las attatgas sin ils democrats en ils Stadis Unids il 2016 e per l’enguladitsch dad emails d’in emettur da televisiun en la Gronda Britannia il 2015.

Il minister da l’exteriur britannic, Jeremy Hunt, ha numnà las attatgas brutalas ed arbitraras. La Russia n’ha betg prendì posiziun davart questas renfatschas. La relaziun tranter la Gronda Britannia e la Russia è il mument fitg tendida.

RR novitads 06:00