I sa tracta da la segunda votaziun davart la cunvegna, quella davart il plan d’acziun, sco l'agentura da novitads Irna annunzia. Tar la decisiun davart la dumonda da principi la dumengia passada aveva quai dà ina vehementa debatta. Il parlament aveva insistì ch'ils inspecturs internaziunals survegnian mo in access limità als implants militars.
La cunvegna cun ils 5 stadis cun dretg da veto tar l’ONU e cun la Germania lubescha a l'Iran il diever civil da l'energia atomara. Strictas controllas internaziunalas duain però evitar, ch'il pajais construescha armas atomaras. Sco cuntramesira vegnan abolidas las sancziuns cunter l'Iran.
RR Novitads 10:00