Il Cussegl d'etica da la Germania sustegna d'extender l'obligatori da vaccinar sin parts pli grondas da la populaziun. Quai però mo cun mesiras flancantas, scriva il Cussegl d'etica en sia recumandaziun decidida cun la maioritad da 20 da total 24 commembers e commembras. Sper la pussaivladad da pudair laschar vaccinar en l'entir pajais ed avair avunda vaccin, duessi era esser pussaivel da tscherner sez, tgenin vaccin ch'ins vul. Il Cussegl recumonda ultra da quai in register naziunal cun datas segiradas ed infurmaziuns chapiblas.
Schlargiar gea – però mo cun mesiras flancantas
Davart la dimensiun ed ils detagls da l'obligatori da vaccinar schlargià è il cussegl d'etica tudestg dividì. Entant che 13 commembers e commembras vulan schlargiar l'obligatori sin tut las persunas creschidas che pon sa laschar vaccinar, vul ina minoritad da 7 commembras e commembers schlargiar l'obligatori mo sin persunas creschidas vulnerablas sco glieud attempada u cun malsognas pre-existentas.
Pass giustifitgà mo en situaziun extrema
In tal obligatori saja en mintga cas ina restricziun considerabla – tant giuridicamain sco era moralmain. Da schlargiar l'obligatori possian ins giustifitgar mo cun mitigiar consequenzas gravantas d'ina futura unda da la pandemia – sco per exempel prevegnir ad in'auta mortalitad, a consequenzas per la sanadad a lunga vista per ina gronda part da la populaziun u ad in collaps dal sistem da sanadad.
La Germania e ses pajais federativs avevan incumbensà il cussegl d'etica da prender posiziun. Quai d'ina vart suenter avair declerà obligatoria la vaccinaziun per persunal da secturs sensibels sco per exempel la tgira. Però era en vista a las preparativas per in obligatori da vaccinar general ch'il chancelier federal Olaf Scholz (SPD) aveva annunzià.