Avant duas emnas avevan anc 69% dals dumandads en Germania tema d’ina attatga terroristica. Suenter l’attatga dal glindesdi passà d’in fugitiv da 17 onns, ch’aveva attatgà cun ina sigir e cun in cuntè quatter persunas en in tren regiunal, para quella tema d’esser s’augmentada. Tenor ina retschertga da l'emettur da televisiun tudestg ZDF teman entant numnadamain gia var 77% dals Tudestgs ch'i dettia las proximas emnas attatgas.
Dapli che la mesadad dals dumandads èn dentant era da l'avis ch'il stadi tudestg fa avunda per la protecziun cunter attatgas. La retschertga sa basa sin intervistas fatgas ils davos dis cun passa 1'200 persunas.
In'unfrenda anc en privel da vita
Ina unfrenda da l'attatga en in tren regiunal a Würzburg, in um da 30 onns, è anc adina en privel da vita. Quai ha communitgà l'ospital universitar da Würzburg. Il segund pazient cun blessuras fitg grevas na saja entant betg pli en privel da vita. Il stadi da l'um da 62 onns saja sa stabilisà.
RR novitads 12:00
