Siglir tar il cuntegn
Inhalt

Exteriur Germania: L'immigraziun e l'integraziun fatschentan il pli fitg

En Germania na datti il mument nagin tema che fatschenta uschè fitg il pievel sco l'immigraziun e l'integraziun da persunas estras. Per 83% dals Tudestgs è quai il problem che la Germania sto schliar il pli urgent. Quai mussa in studi da l'institut da perscrutaziun GfK a Nürnburg.

Ina famiglia da fugitivs a Hamburg.
Legenda: Ina famiglia da fugitivs a Hamburg. Keystone

Tge fa il pli bler quitads als avdants en in pajais? Quai vul l'institut da perscrutaziun GfK evaluar cun ses studi «Challenges of Nations 2016». En la Germania per exempel fatschenta la populaziun il mument cunzunt l'immigraziun e l'integraziun da persunas estras. Per 83% dals Tudestgs è quai il problem che la Germania sto schliar il pli urgent. Cumpareglià cun l'onn passà è quai in augment da passa il dubel.

Sin plazza dus da la rangaziun suonda cun distanza il tema dischoccupaziun. Quel decleran il mument però sulet anc 13% sco il problem il pli urgent.

RR novitads 15:00