- Il Bundestag a Berlin ha elegì in nov chancelier da la Republica Federala Tudestga.
- Il socialdemocrat Olaf Scholz maina cun quai la coaliziun da SPD, FDP e Verds.
- Mardi avevan commembras e commembers da l'uschenumnada coaliziun d'ampla suttascrit il contract da coaliziun.
- Igl è la quarta giada ch’in socialdemocrat daventa chancelier federal.
Il nov chancelier tudestg...
- ha 63 onns ed è naschì ad Osnabrück
- è advocat
- è maridà dapi l'onn 1998 (nagins uffants)
En la politica è Olaf Scholz ina veglia vulp:
- dapi 2018 vice-chancelier e minister da finanzas
- 2011-2018 president da la citad da Hamburg
- 2007-2009 minister per lavur e fatgs socials
- 2002 secretari general da la SPD
- 1998 elecziun en il parlament (Bundestag)
- dapi 1975 commember da la SPD
Il nov schef da la regenza ha survegnì 395 da 707 vuschs. Per l’elecziun avessan er 369 vuschs tanschì ad Olaf Scholz. En tut en tut haja la fracziun d’ampla da SPD, FDP e Verds 416 vuschs en il parlament. Però na sajan betg tuttas deputadas e deputads stads preschents e 707 vuschs sajan vegnidas inoltradas. Tgi che succeda ad Angela Merkel è vegnì decis en ina elecziun secreta.
Sin la dumonda da la presidenta dal Bundestag sch'el acceptia l'elecziun ha Scholz clamà «Gea». Scholz daventa cunquai il 9avel chancelier en l'istorgia da la Republica tudestga. El surpiglia l'uffizi dad Angela Merkel che sa retira suenter 16 onns.
Il cabinet è furmà
Suenter han survegnì las 16 ministras e ministers l'act uffizial da nominaziun dal president da la Germania Frank-Walter Steinmeier. En ses pled ha'l punctuà la responsabladad da la nova regenza. Las spetgas da quests temps critics sajan grondas. El giavischia a la nova regenza mintga success ed in bun maun, per l'amur dal pajais.
Nagin «temp da grazia» per la nova coaliziun
Tradiziunalmain survegn ina nova regenza 100 dis «temp da grazia». Mo durant il temp da pandemia n'è pauc sco usità. La Germania sa chatta cun la quart‘unda da corona amez ina crisa acuta. E la coaliziun da l'ampla amez ha ussa da sa cumprovar.
Dependa dal cabinet, però era da mintga singul
En ses pled accentuescha Olaf Scholz la gronda responsabladad dal cabinet, betg be per la Germania mabain globalmain. Il pievel speria ch'els prendian las mesiras necessarias che la vita publica daventia puspè ina chaussa evidenta. La crisa dumondi bler da tuts ed i dependia ussa da mintga singul.
