Siglir tar il cuntegn

Header

cuntegn

Exteriur Germania refusescha daners da reparaziun per la Grezia

La Germania refusescha las pretensiuns da milliardas d'Euros che la Grezia pretenda dals Tudestgs sco reparaziun anc ord il temp da la segunda guerra mundiala.

La regenza tudestga è dal maini che la dumonda da reparaziun e pajaments d'indemnisaziun saja sclerida a moda giuridica e politica. Il ministeri da giustia grec aveva declerà avant da sequestrar ils bains tudestgs d'immobiglias en Grezia, sch'i na vegnia betg tar in consens cun Berlin tar la dumonda da reparaziuns.

Tribunal internaziunal decida en favur da la Germania

La regenza tudestga aveva clamà il Tribunal internaziunal il 2008, suenter ch'ina dretgira taliana aveva decidì che la Germania stoppia pajar indemnisaziuns per la mazzacra da la "Wehrmacht" il 1944 a Civitella. E per quai intent fissia quai era stà lubì da sequestrar possess tudestg en l'Italia. Il 2012 aveva il Tribunal decidì en favur da la Germania.

La Grezia è era stada pertutgada da quest cass, perquai che la dretgira taliana aveva era decidì en il cass da la mazzacra da la "SS" il 1944 en la vischnanca greca Distomo.

RR novitads 18:00

Artitgels legids il pli savens