Exteriur - Germania vul agentura per armas da cyber
Cun promoziun statala vul la Germania uschia cuntanscher il pli nov stan tecnic en questa sparta. Quai rapporta la revista «Der Spiegel». L'agentura duai garantir che las autoritads da segirtad sco er la defensiun cunter attatgas da cyber hajan ils megliers meds tecnologics, scriva «Der Spiegel».
Per analisar e cumbatter talas attatgas na duai il stadi betg stuair cumprar en sin il martgà liber tals products per cumbatter la criminalitad da cyber. La Germania s'orientescha ad agenturas sumegliantas sco en ils Stadis Unids u en l'Israel. Quels identifitgeschian technologias da cyber decisivas gia en la fasa da svilup. Lura investeschan els daners en start-ups correspundents e survegnan sin quella moda e maniera armas da cyber gia avant ch'i èn sin il martgà liber.
