Exteriur - Germanwings: Co-pilot ha laschà crudar sapientivamain l'aviun

Ils fatgs:

• Il co-pilot ha laschà crudar sapientivamain l'aviun
• Las autoritads partan dal fatg ch'i sa tractia da mazzament intenziunà
• passagiers han realisà la situaziun

Dumondas avertas:

• las raschuns dal co-pilot da laschar crudar l'aviun
• suicidi n'è betg excludì
• segunda black-box n'è betg anc chattada

Il co-pilot da la maschina da Germanwings ha chaschunà la crudada da l'aviun da mardi passà. Sco quai che la procura publica franzosa ha communitgà, saja d’udir sin il registratur da vuschs, co el tiria flad, uschia stoppia el esser stà tar sasez.

Legenda: Il procuratur public franzos Brice Robin (mez) tar la conferenza da medias a Marseille. Keystone

Nagins indizis per in'attatga terroristica

Sco quai ch'il procuratur public Brice Robin ha ditg a las medias eria il pilot serrà ora dal cockpit il mument da la crudada. El saja ì sin tualetta ed haja silsuenter però empruvà da sfratgar en l’isch ch'era serrà d’endadens. Il co-pilot haja gì il commando. Silsuenter saja l'alarm ì liber.

La procura publica franzosa investighescha ussa pervi da mazzament intenziunà. Tenor las inquisiziuns d'enfin qua na dettia quai nagins indizis per in'attatga terroristica.

Profil dal co-pilot senza singularitads

Tenor il ministeri da l'intern tudestg era il co-pilot oriund da la Germania e betg registrà en in register da terrorists. El haja lavurà dapi il 2013 tar Germanwings ed haja gì bun 630 uras experientscha da sgol. Avant sia occupaziun tar la societad aviatica saja el vegnì scolà tar las Lufthansa a Bremen.

Suicidi n'è betg excludì

I saja betg cler, pertge che l'um da 28 onns haja manà sapientivamain la maschina cunter in grip da la Alps franzosas. Il procuratur public n'ha betg vulì trair conclusiuns ord il sacuntegnair dal pilot. El ha però concedì ch'ins possia tschentar la dumonda sch'i sa tractia dad in suicidi.

Nagin sistem dal mund po evitar uschia insatge.

Legenda: Conferenza da medias da la Lufthansa e Germanwings. Livestream SRF

Ils CEO’s da la Lufthansa e la Germanwings han prendì posiziun davart ils fatgs en connex cun la disgrazia d'aviun. Dapi il 2013 saja il co-pilot stà engaschà en in Airbus A320. El haja dumagnà tut ils tests ed il examens, sincerescha Spohr.

Tenor Carsten Spohr sa tractia qua dad in cas singul tragic. Il co-pilot haja cumenzà sia scolaziun il 2008. Suenter sia scolaziun haja el gì ina pausa dad 11 mais.

Ins speria ussa da chattar la segunda black-box per pudair concretisar ils fatgs da las ulitmas minutas en il cockpit.

RR novitads 14:00