Exteriur - Gia 18’000 persunas mortas quest onn pervia da catastrofas
L'emprima mesadad da quest onn èn enturn 18’000 persunas mortas sin l'entir mund en consequenza da catastrofas. Quai sajan gia ussa bler dapli che durant l'entir onn passà, sco quai ch'il re-assicurader Swiss Re scriva.
La pli gronda catastrofa saja stada il terratrembel en il Nepal cun passa 9000 morts. Er las undas da chalira en l'India ed en il Pakistan e las disgrazias da fugitivs en la Mar Mediterrana sajan raschuns per l'aut dumber da morts.
Ils donns economics entras catastrofas sajan dentant stads il prim mez onn dal 2015 relativ modests, concluda Swiss Re.
