En il Giapun è vegnì mess en funcziun in ulteriur reactur atomar. Il segund bloc da l'ovra atomara Sendai produceschia puspè energia, communitgescha la gestiunaria Kyushu Electric Power.
L'avust era gia vegnì mess en funcziun l'emprim bloc da l'ovra. En consequenza da la catastrofa da Fukushima il mars 2011 aveva il Giapun tschentà giu tut ils 48 reacturs en il pajais per radund 2 onns.
L'ovra atomara Sendai è stada la prima ch'aveva ademplì il 2014 las novas pretaisas da segirezza. La regenza numna questas las pli severas dal mund.
