Exteriur - Giavischs e regals per il di da l'Europa

Ils parlamentaris grischuns persequiteschan in zic inquetads ils svilups actuals enturn l'Uniun Europeica. Surtut la tendenza dals ultims onns, da centralisar adina pli fitg la pussanza a Brüssel vegn crititgada. Quai saja tranter auter era la raschun daco ch'i dettia en blers pajais giavischs per sa distatgar da l'UE.

«Mintgin guarda be per sasez»

Silva Semadeni (PS) è persvasa che l'Uniun Europeica sto daventar pli ferma, sociala ed ecologica. I dettia memia blers che pensan che las schliaziuns naziunalas sajan meglras che las communablas.

Regal per l'Europa: Dunnas ed umens engaschads

«Pulpa e chaschiel per politichers da Brüssel»

Magdalena Martullo-Blocher (PPS) crititgescha la birocrazia en l'UE e politichers che celebreschan lur pussanza. Gist per l'economia fissi dentant necessari che l'Uniun Europeica laschass dapli libertads als singuls stadis.

Regal per l'Europa: In di en il Grischun

«Dapli autonomia per ils commembers»

Martin Candinas (PCD) cusseglia a l'Uniun Europeica da reponderar sias structuras e da decentralisar las pussanzas. La Svizra pudess esser in exempel.

Regal per l'Europa: Carta da la Svizra

«Grazia a l'UE n'avain nagina guerra»

Duri Campell (PBD) giavischa che l'UE chatta ina via per sa tegnair ensemen. L'idea ch'ils stadis fissan pli ferms sch'els extrassan, saja privlusa.

Regal a l'Europa: Sche la Svizra entrass (n'è dentant betg realistic)

Di da l'Europa - la naschientscha da l'UE

Il di da l'Europa vegn festivà mintgamai ils 9 da matg - en memoria al di da la decleraziun da Schuman: Ils 9 da matg 1950 ha l'anteriur minister da l'exteriur franzos Robert Schuman tegnì in pled a Paris ed ha declerà sia idea d'ina nova furma da collavuraziun en l'Europa - tranter auter per evitar guerras tranter stadis europeics. Quest'idea da Schuman vala sco cumenzament da l'Uniun Europeica dad ozendi.

RR actualitad 06.00ff