Siglir tar il cuntegn

Header

Navigaziun

cuntegn

Exteriur «Gilets Jaunes» – entamez las demostraziuns

Leander Albin da Tersnaus en Lumnezia è actualmain a Toulouse en Frantscha per in barat durant ses studi da pedagogia a Berna. Las dimensiuns da las demonstraziuns sco er quants che sustegnan la violenza impressiuneschan il giuven student.

demonstrant cun ina vesta melna durant las demonstraziuns en in nivel da fim sin via a Paris
Legenda: Durant las demonstraziuns a Paris Ils demonstrants cun las vestas melnas (gilets jaunes) han inizià l'unda da protestas actuala en Franscha. Keystone

I na saja betg be ina gruppa da students che demonstreschia mabain glieud da tuttas direcziuns politicas, giuven sco vegl. E tuts veglian ch'i sa midia insatge.

Il pli surstà è Leander Albin da la violenza e quants che sustegnian las gruppas che demoleschian chaussas. El haja er discurrì cun glieud pli veglia che saja er sa participada a las demonstraziuns. Ed er là saja avant maun in grond sustegn per ils protests violents.

Violenza encunter Macron e malgiustia

Sonda passada saja quai stà in pau in caos a Toulouse ed ins n'haja gnanc propi savì tgi che demonstreschia uss per tge. Per il clima, per meglras cundiziuns da lavur u simplamain cunter il stadi e la polizia. Ma en general demonstreschian blers cunter lur president Emmanuel Macron ed il sistem politic:

Macron sa deporta plitost sc'in retg, dian ins qua.
Autur: Leander Albinstudent, actualmain a Toulouse

Macron haja relaschà als ritgs la taglia sin possess ed augmentia la taglia sin benzin e diesel. Quei pertutgia tuts e blers sa sentian tractads malgistamain.

In mintga di tut auter che normal

Gist plirs dis sajan crudads ora bunamain tut ils bus, trams e trens a Toulouse, uschia il giuven da 26 onns. Ins dovria lura simplamain quai ch'ins haja, sco per exempel il velo enstagl dal tram u dal bus. Las butias hajan gì avert u serrà sonda passada tut tenor situaziun sin via. Ma la glieud paria bunamain sco dad esser disada vi da talas situaziuns.

Entant saja la situaziun sa calmada in pau er a Toulouse. Sche las demonstraziuns sajan uss a fin u betg, saja grev da dir per el. La opiniuns giajan ina ord l'autra: Ils ins quintan ch'ils protests tschessan, auters quintan cun anc pli grondas demonstraziuns vers la fin da l'onn.

Legenda: Guardar il video Frantscha - Gilets Jaunes tge munta quai?. Durada 00:34 minutas.
Or da RTR Social dals 04.12.2018.

RR actualitad 17:00