Globalmain hai damain armas atomaras

Sin l'entir mund datti adina damain armas atomaras. Nagin dals stadis atomars na vul dentant desister dal tut da ses arsenal, quai tenor in rapport da l'institut da perscrutaziun da pasch Sipri.

Ina rachetta cun in chau nuclear da l'India. Bild in Lightbox öffnen.

Legenda da maletgs: La India è in dals 9 stadis sin il mund che possedan armas atomaras. Keystone

Tenor ils perscrutaders sa reducescha il dumber d'armas atomaras en spezial perquai ch'ils Stadis Unids da l’America e la Russia sminueschan cuntinuadamain lur arsenals. Omadus pajais possedan ensemen radund 93% da tut las armas atomaras dal mund. La reducziun dal dumber d’armas atomaras fa dentant mo plaun progress.

L’arsenal d’armas atomaras vegn modernisà

El medem mument sco ils Stadis Unids e la Russia reducescha il dumber d’armas atomaras, investeschan ils dus pajais en la modernisaziun da l’arsenal d’armas nuclearas, scriva il Sipri en ses rapport. Uschia vulan ils Stadis Unids investir tranter ils onns 2015 e 2024 en tut 348 milliardas dollars en il mantegniment e la modernisaziun da las armas atomaras. Stimaziuns quintan cun ina billiun dollars che duai vegnir investì ils proxims 30 onns.

Il dumber da rachettas cun in chau atomar è gronds

Ils Stadis Unids possedan en tut circa 7’000 chaus nuclears, la Russia sur 7290. En tut possedan tut ils 9 stadis atomars dal mund 15’395 rachettas cun in chau nuclear, scriva il Sipri. Tut ils stadis hajan cumenzà da sviluppar novs sistems da rachettas ni almain communitgà da vulair far quai. Sco in dals mainaprojects da Sipri ha ditg saja l’intenziun da reducir las armas atomaras dada, ma in progress tar il discharmament nuclear na dettia quai betg propi.

RR novitads 12:00