Siglir tar il cuntegn

Exteriur Granatas svizras pudessan esser en mauns dal SI

Granatas a maun dal concern d'armaziun svizzer Ruag pudessan esser en mauns da la gruppa da terrur Stadi Islamic en la Siria. Tenor la Ruag pudessi sa tractar da granatas d'ina furniziun dal 2003/2004 als Emirats Arabs Unids.

logo da la ruag
Legenda: Per confermar definitivamain la derivanza da las granatas a maun, stuessan ins pudair examinar las granatas, scriva la Ruag. Keystone / archiv

Tenor il concern d'armaziun svizzer Ruag pudessan las granatas ch'il «Sonntagsblick» aveva publitgà en in rapport cun fotografias vegnir d'ina atgna furniziun, communitgescha la Ruag. Ina furniziun dal 2003/2004 lubida dal Secretariat per economia (Seco) als Emirats Arabs Unids (EAU). Ina conferma definitiva è tenor la Ruag mo pussaivla cun nummera da seria ubain cun intercurrir fisicamain ina da las granatas.

Pretensiuns dal «SonntagsBlick»

Personen-Box aufklappenPersonen-Box zuklappen

Fotos actualas da l'allianza dschihadistica Haiat Tahrir al-Scham mussan bumbas zambregiadas, buis, tschintas explosivas e granatas a maun. Tenor il «SonntagsBlick» han plirs spezialists d'armas confermà che las granatas a maun sajan svizras (dals tips OHG92 e HG85).

Talas granatas da la furniziun da 225'000 tocs als Emirats Arabs Unids (EAU) sajan vegnidas en la Siria – quai cunter las garanzias en il contract cun ils EAU, constatescha la Ruag en connex cun il rapport en la gasetta da la dumengia. Ils emirats hajan silsuenter dà vinavant ina part da las granatas a la Jordania – quai nunlubidamain.

Furniziuns mo ad armadas e stadis sin la glista

Dapi lura n'haja la Ruag furnì naginas granatas a maun en il spazi arab. La Ruag sa tegnia strictamain vid las prescripziuns svizras per l'export d'armas. Pia ch'i furneschan armas mo ad armadas e forzas da segirtad da stadis lubids tras la glista dal Seco.

Debatta davart schluccar prescripziuns per l'export

Dacurt aveva il Cussegl federal decidì da sustegnair ina revisiun da l'ordinaziun da l'export d'armas da guerra. En questa revisiun propon cumissiuns dad omaduas chombras parlamentaras da schluccar ella. Exports da material da guerra duain esser pussaivels era en stadis cun in cunflict armà intern, sch'ins possia presupponer che questas armas na vegnian betg duvradas en quest cunflict.

Actualmain lubescha l'ordinaziun l'export d'armas mo en stadis che n'èn betg intretschads en cunflicts armads interns ubain internaziunals.

Reacziun da la cumissiun da segirezza

Il president da la cumissiun per la segirezza politica dal Cussegl naziunal, Werner Salzmann, ha reagì il glindesdi si sin ils rapports en las gasettas da la dumengia: Il cas giaja enavos sin il temp avant la decleraziun dal Cussegl federal il 2006. Dapi lura saja il «dar vinavant» da material da guerra vegnì scumandà explizit. Plinavant saja il cas vegnì elavurà il 2012 dal Seco, uschia il president. Silsuenter saja la controlla dals exports da guerra en ils Emirats Arabs unids vegnida rinforzada.

RR novitads 12:00