Tar las tractativas davart la cunvegna da commerzi liber TTIP fan ils Stadis Unids para pressiun sin l'Uniun Europeica. Quai mussan documents secrets da las tractativas che Greenpeace Ollanda, l'organisaziun per la protecziun da l'ambient, ha dà a medias tudestgas.
Ord copias dals documents secrets ch'èn vegnids surdads a la «Süddeutscher Zeitung», WDR e NDR, resultia ch'ils Stadis Unids smanatschan tranter auter, da bloccar ils levgiaments d'export per l'industria d'autos europeica. Quai sche l'Europa n'è betg pronta dad acceptar dapli products agriculs or dals Stadis Unids. En tut ha Greenpeace Ollanda mess a disposiziun 240 paginas dals documents secrets.
