La regenza filippina ha cusseglià a las regenzas localas dad evacuar las persunas sco mesira preventiva. Il schef dal servetsch civil da la provinza Bicol ha ditg ch'en sia regiun stoppian almain 400'000 persunas vegnir evacuadas. Ils centers d'evacuaziun sappian dentant betg porscher in suttetg a tut quels. Intginas persunas stoppian perquai mirar da vegnir suttetg tar parents ed amis.
Undas autas e bovas
Il Taifun «Nock-Ten» duai cuntanscher la dumengia l'insla Catanduanes, in'insla periferica cun 250'000 abitants. Il center d'admoniziun dals Stadis Unids quinta cun sveltezzas da vent da fin 222km/h. Glindesdi duai il taifun cuntanscher la chapitala da las Filippinas, Manila.
Il servetsch meteorologic filippin avertescha ch'i possia dar undas da fin dus meters a la costa da l'ost. Plievgia ferma pudess plinavant chaschunar bovas ed auas grondas.
RR novitads 12:00