Tar in attentat cun bumbas sin in martgà datiers da la chapitala iracaisa Bagdad èn mortas passa 120 persunas. Sco quai ch'il guvernatur local communitgescha, sajan ulteriuras 130 persunas vegnidas blessadas.
L’attentat da suicidi cun ina bumba era stà ier saira en la citad Bani Saad. La milissa da terror Stadi islamic è sa responsada gia l'avantmezdi per l'attatga. La regiun pertutgada è per gronda part sut controlla dals extremists. Dapi l'entschatta dal 2014 èn almain 15’000 persunas vegnidas mazzadas en ils cumbats tranter l'armada iracaisa ed il Stadi islamic, uschia las Naziuns Unidas.
