En Grezia duain las rentas per l’emprima giada dapi 10 onns puspè vegnir auzadas. Quai ha annunzià il primminister Kyriakos Mitsotakis en ses pled annual davart la situaziun economica dal pajais. Radund 1,5 milliuns persunas pensiunadas pudessan uschia quintar l’auter onn cun ina renta pli auta.
Augment da paja minimala
En pli duaja la paja minimala vegnir augmentada l’auter onn. Per surmuntar la crisa da daivets dal 2009 han ils stadis da la zona da l’euro ed il Fond monetar internaziunal IWF emprestà daners a la Grezia. Quests emprests èn dentant stads colliads cun refurmas e mesiras da spargn rigurusas – tranter auter er da scursanir las rentas. Questa primavaira ha il pajais lura pudì pajar enavos ses daivets al Fond monetar internaziunal.