Siglir tar il cuntegn

Header

Il nov primminister da la Grezia, Kyriakos Mitsotakis.
Legenda: Il nov primminister da la Grezia, Kyriakos Mitsotakis. Keystone
cuntegn

Grezia Conservativs gudognan las elecziuns

La regenza greca mida: Las elecziuns dal parlament anticipadas han ils conservativs da la partida Nea Dimokratia gudagnà. Il schef da la regenza actuala, Alexis Tsipras ha concedì sia terrada e gratulà al nov primminister Kyriakos Mitsotakis.

En Grezia ha la partida conservativa Nea Dimokratia cun Kyriakos Mitsotakis gudagnà cleramain las elecziuns anticipadas dal parlament. Tenor indicaziuns dal ministeri da l'intern ha Nea Dimokratia cuntanschì stgars 40%. Per il parlament vul quai dir, ch'ils conservativs cuntanschan la maioritad absoluta dad almain 154 sezs. En Grezia survegn la partida che gudogna las elecziuns numnadamain 50 sezs supplementars per simplifitgar la furmaziun d'ina regenza.

La partida da la sanestra Syriza dal primminister actual, Alexis Tsipras, ha cuntanschì mo bun 31% da las vuschs. Tsipras ha concedì sia terrada e gratulà a Mitsotakis. En pli ha Tsipras accentuà che sia partida vegnia er en futur a s'engaschar en il parlament per temas sco giustia sociala.

Gia oz glindesdi duai il nov primminister Kyriakos Mitsotakis vegnir serementà. Per l'avantmezdi è planisà che il primminister da fin uss, Alexis Tsipras, surdat l'uffizi al nov primminister. Il suentermezdi vegn Mitsotakis lura a preschentar ses nov cabinet.

RR novitads 06:00