Gia la fin da zercladur n'aveva il pajais betg pajà ina rata da 1,6 milliardas. La regenza greca aveva però annunzià da vulair pajar enavos la summa en ina giada. Il retard da pajament muntia ussa a 2 milliardas euros, communitgescha l'IWF.
Il glindesdi era la gruppa da l'euro sa cunvegnida ad in sboz per in terz program d'agid per il pajais en la crisa. La Grezia sto l'emprim però realisar las refurmas pretendidas.
Demonstraziun cunter pretaisas da la gruppa da l’euro
Ad Athen han pliras tschient persunas demonstrà ier saira cunter questas pretensiuns dals stadis da l'euro. La polizia discurra da 700 demonstrants.
Commembers dal sindicat per il servetsch public e partidas da la sanestra, che n'èn betg represchentadas en il parlament èn sa radunadas avant il parlament ed han pretendì ch'ils debits dal pajais vegnian relaschads. Ordavant aveva il sindicat appellà ad ina chauma da 24 uras per mesemna. Il di ch'il parlament grec decida probabel davart las refurmas.
RR novitads 06:00
