Nagina reducziun dals debits, però in pachet d'agid da 35 milliardas ed ina restructuraziun duain puspè gidar en pe il pajais en la crisa. Sco quai che Jean-Claude Juncker, il president da la cumissiun da l'UE ha ditg, saja in uschè numnà Grexit cunquai definitivamain giud maisa.
La Banca centrala europeica ha entant decis laschar ses agid d'urgenza per las bancas grecas sin 90 milliardas.
Bancas restan serradas vinavant
Las bancas en il pajais restan er vinavant serradas, ha fatg a savair il ministeri da finanzas grec. Quant ditg che quai saja anc il cas saja avert.
Ad Athen ha l'ala sanestra da la partida regenta Syriza entant appellà da far frunt als resultats da Brüssel. La cunvegna offendia la Grezia ed ils Grecs, scriva la partida sin sia pagina d'internet.
Avant pudair contractar dovri anc il consentiment en ils parlaments en Grezia, ma er en Germania ed ulteriurs pajais da la zona da l’euro. Alura possian ils discurs concrets davart il program da spargn cumenzar.
Quintà cun agid finanzial dad 82 fin 86 milliardas euros
La chanceliera tudestga Angela Merkel quinta cun in agid finanzial dad 82 enfin 86 milliardas euros ils proxims trais onns, quai ha Merkel ditg a las medias suenter l’inscunter da 17 uras.
La gronda part da 25 milliardas euros vegnia duvrada per dar chapital a las bancas. Vinavant ha Merkel ditg che l’administraziun greca stoppia vegnir modernisada, era quai saja ina part da la cunvegna cun la Grezia.
Il parlament en Grezia stoppia uss decider enfin mesemna sur da las refurmas da la taglia sin plivalur, ma era sur da la reconstrucziun da l'uffizi da statistica, sco era sur dal sistem da rentas, ha ditg Merkel.
Alexis Tsipras è cuntent cun l'inscunter
Il president da la Grezia, Alexis Tsipras è cuntent cun l’inscunter dals stadis da l’euro. Il cumbat saja stà dir, ma gist, ils debits vegnian uss restructurads e las bancas survegnan chapital, ha ditg Tsipras. Il cumbat stoppia uss vegnir manà en Grezia, perquai che la Grezia basegnia refurmas fundamentalas, ha argumentà Tsipras.
Euro puspè pli ferm
La cunvegna en la dispita da debits da la Grezia ha effectuà ch'il franc svizzer è puspè daventà pli flaivel. Suenter che l'euro era crudà la damaun sin 1,0450 francs, custa 1 euro entant bunamain 1,05 francs.
Er ils martgads d'aczias en Svizra e l'Europa han reagì a moda positiva. Curt suenter ch'il cumpromiss tranter la Grezia ed ils crediturs internaziunals è vegnì enconuschent, ha il SMI fatg in sigl da 0,78 puncts. Era las bursas europeicas nudavan curt suenter las 10 in plus da fin 1,67%.
RR novitads 10:00 / 15:00
