En la Gronda Britannia datti grondas midadas en la regenza. La ministra da l'interiur Suella Bravermann è vegnida relaschada dal primminister Rishi Sunak. Sunak è vegnì sut squitsch pervia da Braverman. Braverman è sco ministra da l'intern era responsabla per la polizia e per la segirezza naziunala. En il passà ha ella gia fatg pliras remartgas dispitaivlas. En in artitgel, ch'ella ha publitgà senza sustegn da la regenza en la gasetta Times, ha ella renfatschà a la polizia morala dubla en connex cun las demonstraziuns pro-palestinaisas.
David Cameron turna
Il minister da l'exteriur d'enfin uss James Cleverly daventa da nov minister da l'intern. L'anteriur prim-minister David Cameron daventa nunspetgadamain il nov minister da l'exteriur. Cameron è stà da l'onn 2010 fin l'onn 2016 primminister da la Gronda Britannia. Suenter ch'el aveva pers la votaziun dal Brexit era el sa retratg.
L'onn che vegn datti elecziun en la Gronda Britannia, tenor las retschertgas actualas perdess la Partida conservativa da Rishi Sunak las elecziuns. Or da quest motiv è in midament dal cabinet gia vegnì spetgà dapi in temp.
Ministra per ambient ha demissiunà
La Gronda Britannia dovra uss er anc ina nova ministra per ambient. Thérèse Coffey ha annunzià sia demissiun en ina brev al primminister Rishi Sunak. Daco na di ella betg. Ella empermetta dentant da vinavant sustegnair Sunak en il parlament.