Suenter in vi e nà davant diversas dretgiras sur onns ed onns è uss la regenza britannica stada vidlonder. Il High Court a Londra aveva revocà l'onn passà il scumond d'extradir Julien Assange, pervi da privel da suicidi. La dretgira la pli auta, il Supreme Court, aveva lura refusà in'appellaziun.
Sche e cura che l'Australian da 50 duai vegnir extradì, n'è anc betg cler. Tenor ses aderents, na sajan las pussaivladads giuridicas anc betg duvradas si. Els teman ch'Assange pudess vegnir en ils Stadis Unids en ina praschun d'auta segirezza, malgrà che Washington ha empermess insatge auter.
La giustia americana accusa Assange pervi da spiunascha. El pudess survegnir fin a 175 onns praschun. Ad el vegn renfatschà ch'el haja engulà ensemen cun la whistleblowra Chelsea Manning, material secret davart acziuns militaricas da l'USA en l'Irak e l'Afganistan. Cun quai haja el mess en privel la vita d'infumrants dals Stadis Unids.
Ses adversaris vesan en el dentant in schurnalist investigativ, che ha sclerì crims da guerra ed al qual i vegnia uss statuì in exempel.