Il vehichel derivia il pli probabel da la Bulgaria ed ins haja chattà quel la bun'ura en ina zona industriala da Garys en l'ost da Londra, ha communitgà la polizia. Tar las baras sa tractia tenor emprimas enconuschientschas da 38 creschids ed in giuvenil.
Anc betg cler sch'igl è migrants
Cun las baras vegni fatg in'obducziun. Schebain i sa tracta da baras da migrants ch'èn vegnids transportads en il pajais n'è anc betg cler. Dapi onns emprovan dentant fugitivs da vegnir sur quella via en il pajais. Holyhead, nua che la polizia ha chattà il camiun, è in dals pli impurtants ports per navs da l'Irlanda. Tranter l'Irlanda e la Gronda Britannia na datti per regla naginas controllas da cunfin.
Eveniments sgarschaivels
L'onn 2014 han collavuraturs dal port da Tilbury, betg lunsch da Garys, avert in container da bastiment suenter ch'els han udì cloms per agid e spluntar. En il container han els chattà ina bara e 34 Afgans. Quels eran sco els sezs han ditg fugids or da lur pajais perquai ch'els appartegnevan a la minoritad religiusa dals sikhs. In um n'ha betg survivì il viadi.
L'avust 2015 aveva il chat da 71 fugitivs stenschids en in camiun en l'Austria chaschunà gronda sgarschur sin l'entir mund. Las persunas da la Siria, l'Irak e l'Afganistan eran vegnids mess da deportaders en in camiun e transportads sur il cunfin da l'Ungaria e la Serbia. Il zercladur ha ina dretgira sentenzià ils quatter deportaders ad arrest per vita duranta.
RR novitads 15:00