Siglir tar il cuntegn

Exteriur Gronda Britannia vul lubir autos che van autonomamain

Dal 2021 vul la Gronda Britannia laschar ir sin las vias vehichels che charreschan da sez. Sco quai ch'il ministeri da finanzas ha communitgà, vul il minister da finanzas Philipp Hammond preschentar las novas prescripziuns davart il charrar autonomamain la mesemna.

Persuna va cun auto, na tegn dentant betg la roda da manischar.
Legenda: La Gronda Britannia vul lubir autos autonoms davent da l'onn 2021 (maletg d'archiv). Keystone

Tenor quai vul la regenza britannica promover ils autos electrics ed investir 522 milliuns francs en la construcziun da staziuns da chargiar. Plinavant veglia la regenza er sustegnair la cumpra dad e-autos.

Sustegn per interpresas che lavuran vid intelligenza artifiziala

En vista a novas tecnologias vul il minister da finanzas Philipp Hammond era metter a disposiziun bunamain 100 milliuns francs per interpresas che perscruteschan l'intelligenza artifiziala.

Uschia duai vegnir promovida per exempel la zunt sperta rait per telefonia mobila 5G. Quella rait saja numnadamain ina tecnologia necessaria per il charrar autonomamain.

RR novitads 09:00