En cas d'in Brexit senza cunvegna, vul la Gronda Britannia rinforzar il cunfin – tranter l'Irlanda dal nord che tutga tar la Gronda Britannia e l'Irlanda che tutgass lura anc adina tar l'UE – cun radund 1'000 policists. Quai per evitar escalaziuns.
Votaziun durant terza emna da schaner
Il parlament britannic decida durant la terza emna da schaner davart la cunvegna da Brexit cun l'Uniun europeica. Sche la cunvegna vegn refusada – tenor gliez guarda quai ora il mument – smanatscha ils 29 da mars ina sortida da l'UE nunordinada. Millis da regulaziuns per traffic e commerzi che va sur ils cunfins fissan d'in di sin l'auter nunvalaivlas e controllas da cunfin stuessan vegnir introducidas.
L'Irlanda avess da perder en in tal cas il pli bler da tut ils stadis che restan en l'UE. Per els è la Gronda Britannia il pli impurtant martgà per nutriment da l'Irlanda. I giess qua per tschients milliuns euros.
RR novitads 09:00