Siglir tar il cuntegn
Inhalt

Exteriur Gronda debatta da Brexit

Leave or remain? Avant la votaziun da gievgia ha BBC organisà in'ultima debatta davart Brexit - pia la decisiun da la Gronda Britannia da restar en l'Uniun Europeica u da sortir. Igl è stà ina gronda show en il stadion da Wembley a Londra.

Il maletg mussa ina tribuna cun politichers britannics
Legenda: 6 politichers sin tribuna ed 8000 aspectaturs en il stadion da Wembley - quai è stada l'ultima gronda debatta da Brexit. Keystone

Ils temas èn stads clers: Economia, immigraziun e democrazia. Quai èn era quels trais temas che domineschan las discussiuns actualas enturn in Brexit. Ils 8000 aspectaturs en il stadion da Wembley han bain pudì tedlar ina debatta viva e captivanta - novs arguments n'han ni adversaris ni adherents da l'Uniun Europeica purtà.

«Take back control»

Ils promoturs d'in Brexit, pia quels che lessan sortir da l'UE, han repetì cuntinuadamain lur motto "survegnir enavos la controlla". Els pretendan cunquai dapli suveranitad da la Gronda Britannia p.ex. per limitar l'immigraziun u era per l'economia. "In slogan n'è anc nagin plan", ha Sadiq Khan, il president actual da Londra respundì. El s'engascha vehementamain per che la Gronda Britannia restia vinavant en l'Uniun Europeica. Cunquai hai dà ina interessanta debatta cun ses antecessur: Boris Johnson, anteriur president da Londra ed in dals pli promiments promoturs d'in Brexit.

RR Actualitad 07:00