Siglir tar il cuntegn
Inhalt

Exteriur Gronda devastaziun sin l'insla Sulawesi

Suenter dus terratrembels ed in tsunami sin l'insla Sulawesi èn il venderdi passa 800 persunas mortas e pliras tschient persunas vegnidas blessadas. Bleras persunas vegnan anc supponidas sut las ruinas ed il provediment medicinal è crudà ensemen.

chasas devastadas. Ins vesa mo singulas paraids.
Legenda: Grondas devastaziuns suenter terratrembels sin l'insla Sulawesi en l'Indonesia. Keystone

Sco il servetsch da catastrofas dal pajas en il sidost da l'Asia ha entant confermà che passa 830 persunas èn mortas pervi dals terratrembels ed il tsunami da l'ultim venderdi. Il vicepresident da l'Indonesia, Jusuf Kalla, tema, ch'il dumber dad unfrendas pudess anc crescher sin plirs millis. Anc na dettia nagin contact tar las regiuns pertutgadas.

Bleras persunas sparidas

Il territori ch'è vegnì devastà dals terratrembels e dal tsunami saja bler pli grond che quai ch'era vegnì supponì l'emprim, han communitgà las autoritads. Anc adina valan bleras persunas sco sparidas. In grond dumber d'ellas pudess esser sutterrà sut las ruinas. Il provediment medicinal sin l'insla saja per gronda part crudà ensemen.

Undas da fin 6 meters autezza

Il segund terratrembel cun la fermezza da 7,5 sin la stgala da Richter aveva chaschunà il venderdi in Tsunami cun undas da fin 6 meters autezza a la costa da la citad da turists Palu ed il vitg da pestgaders Donggala. En omadus lieus vivan ensemen passa 600'000 persunas. Millis da chasas, clinicas, butias ed hotels sajan vegnidas destruidas.

RR novitads 10:00