Il minister da finanzas american Steven Mnuchin ha annunzià la pli gronda reducziun da la taglia e la pli gronda refurma fiscala en l'istorgia dals Stadis Unids. Las taglias per interpresas vul la regenza americana sbassar da 35 sin 15 pertschient. Cun simplifitgar il sistem fiscal duain era vegnir realisads levgiaments per ils singuls burgais.
Dapli slantsch per l'economia
Cun questas mesiras duai l'economia americana survegnir dapli schlantsch e las interpresas duain pudair concurrer meglier. Quai ha il minister da finanzas Mnuchin ditg tar in'occurrenza da la pagina d'internet politica «The Hill».
La realisaziun da la refurma fiscala savess però durar ditg. Decider sto la finala il congress. Era sche omadus cussegls dal parlament han maioritads republicanas èn ils interess en dumondas impurtantas tuttina divers. Ina refurma fiscala cun levgiaments massivs, strapatschass il budget da l’USA memia ferm.
RR novitads 17:00