Siglir tar il cuntegn

Header

uffants sesen en cerchel avant fluras ed ina scrittira "Paris" giun plaun
Legenda: Uffants mettan fluras avant l'ambassada franzosa a Berlin per commemorar las unfrendas e mussar lur solidaritad. Keystone
cuntegn

Exteriur Gronda solidaritad suenter las attatgas sanguinusas a Paris

La citad da Paris è vegnida scurlattada venderdi saira dad in'unda da terror. En sajettims ed explosiuns en 6 differents lieus èn mortas tenor las autoritads franzosas almain 128 persunas, passa 250 èn blessadas. Sin l'entir mund mussan regenzas e populaziun solidaritad.

Cumpact

  • Almain 128 persunas èn mortas, passa 250 èn vegnidas blessadas; la gronda part da quellas en il local da concert Bataclan.
  • La chapitala è vegnida attatgada en 6 differents lieus.
  • La gruppa da terror «Stadi Islamic» ha declerà d'avair instradà las attatgas.

François Hollande: «Paris stat airi»

Tar questas attatgas sa tractia quai da las pli grevas en l'istortgia da la Frantscha, ha ditg il president François Hollande. Gia en in pled a la naziun da la notg era il president da stadi franzos, François Hollande, s'exprimì cler e bain en la televisiun franzosa TF1. El haja pretendì agid militar per l'agglomeraziun parisiana, ed ha appellà ad unitad e detschertadad en la persecuziun dals delinquents ed il cumbat dal terror.

Nus stuain mussar unitad e sang fraid. En vista al terror sto la Frantscha esser ferma e gronda - era las autoritads dal stadi. Nus vegnin ad esser quai.
Autur: François HollandePresident da stadi franzos

Il president François Hollande ha discurrì dad attatgas terroristicas ch'i n'haja anc mai dà en Frantscha. El ha plinavant proclamà il stadi d'urgenza e serrà ils cunfins. Quai aveva il ministeri da l'intern curt suenter però precisà: ils cunfins na vegnian betg serrads, mabain ch'i dettia controllas als cunfins; sin via, en ils trens ed als eroports. I saja vegnì mobilisà 1'500 ulteriurs schuldads.

Davart ils attatgaders datti paucas infurmaziuns

Tar l'assagl da la polizia da mesanotg per liberar ils ostagis en la halla da concert Bataclan sajan morts 3 dals attatgaders, rapporta AFP. Quants ch'han survivì - ubain èn anc sin la fugia n'è betg cler. Entant ha la gruppa da terror «Stadi Islamic» concedì d'avair organisà las attatgas. Sche e quants attatgaders èn anc sin fugia, n'è betg enconuschent.

Entant rapporta l'agentura franzosa AFP che la polizia haja chattà in pass da la Siria tar in dals attentaders. Quai rapporta AFP cun sa referir sin infurmaziuns da la polizia.

Fatgs, rapports e valitaziuns da Paris

  • Sommaruga: «Nus condemnain detschartamain ils attentats»

    La presidenta da la Confederaziun, cussegliera federala Simonetta Sommaruga è schoccada dals attentats.

  • audio
    Terror a Paris, update 12:00
    ord Actualitad dals 14.11.2015.
    laschar ir. Durada: 2 minutas 6 Secundas.

    «Cette fois, c'est la guerre» (12:00)

    In titel en ina gasetta che descriva la situaziun e las emoziuns d'ina entira naziun. 128 persunas han pers la vita e 250 èn vegnidas blessadas.

  • audio
    Terror a Paris, perditgas
    ord Actualitad dals 14.11.2015.
    laschar ir. Durada: 3 minutas 10 Secundas.

    In sentiment da sgarschur.... (12:00)

    quai raquintan duas perditgas.

  • audio
    Mario Pacchioli era en concert, cura ch'ils attentats han cumenzà (11:00)
    ord RTR Audio dals 14.11.2015.
    laschar ir. Durada: 3 minutas 45 Secundas.

    Sco ch'ils da Paris han realisà ils attentats (11:00)

    Mario Pacchioli è chantautur, viva a Paris e deva gist in concert, cura ch'ils attentats han cumenzà.

  • audio
    Valitaziuns da l'expert per strategia e segirtad Albert Stahel (10:00)
    ord RTR Audio dals 14.11.2015.
    laschar ir. Durada: 3 minutas 36 Secundas.

    Valitaziuns dad Albert Stahel (10:00)

    Albert Stahel è expert per strategia e segirtad a la Scol'auta politecnica a Turitg.

  • audio
    Il correspondent da gasettas Stefan Brändle davart attatgas e vita actuala a Paris (09:45)
    ord RTR Audio dals 14.11.2015.
    laschar ir. Durada: 2 minutas 52 Secundas.

    Fatgs ed impressiuns da Stefan Brändle (09:45)

    Stefan Brändle è correspondent a Paris per pliras gasettas.

  • audio
    Il pled a la naziun dal president franzos François Hollande
    ord RTR Audio dals 14.11.2015.
    laschar ir. Durada: 2 minutas 51 Secundas.

    Il pled a la naziun dal president (00:00)

    L'emprim pled a la naziun dal president da la Frantscha François Hollande da mesanotg suenter las attatgas sanguinusas.

La pli greva attatga en il Bataclan

Gist en 6 lieus a Paris hai dà venderdi saira attatgas terroristicas. La pli greva en il center da la citad durant in concert da rock en il «Bataclan». Perditgas raquinta ch’i saja stà «Scenas sco en la guerra...» 6 fin 7 attentaders sajan entrads en il bajetg, hajan clamà «Allah è grond» e hajan sajettà enturn. Suenter sajan plirs attentaders sa siglientads en l’aria, avant che la polizia haja pudì intervegnir.

Tar l'attatga sin la halla da concert Bataclan sajan mortas 100 persunas, rapporta l'agentura da novitads franzosa AFP e sa referescha sin circuls da la polizia. Là eran radund 1'500 persunas sa radunadas per tadlar in concert.

Attatga datiers dal Stade de France

In'autra explosiun hai dà datiers dal stadion da ballape, nua che la Frantscha giugava encunter la Germania. I n’haja dentant dà nagina panica, ils 80’000 fans hajan bandunà tut ruassaivel il «Stade de France», il stadion nua ch'il campiunadi europeic da ballape vegn avert il zercladur.

En il stadion era er il president franzos Francois Hollande, ch'è immediat vegnì evacuà. Silsuenter è el sa drizzà a la naziun ed ha discurrì d'ina situaziun dad orrur.

Terror fa endament attatgas sin Charlie Hebdo

Il terror a Paris fa endament las attatgas ch'i ha dà avant 10 mais sin la redacziun da la gasetta satirica Charlie Hebdo. Mo cun ina nova dimensiun, manegia l’expert da segirtad da la Fundaziun per scienza e politica, Markus Kaim. L’expert da segirtad manegia ch'ins na possia strusch evitar talas attatgas terroristicas. La Frantscha haja fatg blers sforzs il davos temp per garantir la segirtad, uschia saja la polizia ed il militar stada preschenta massivamain dapertut.

Ina dumonda centrala, era per l’avegnir, saja la dumonda tgi ch'ils attentader sajan. Sch'i sajan persunas franzosas che sajan vegnidas radicalisadas u sch’i saja persunas da l’exteriur che sajan vegnids sur ils cunfins.

RR novitads 23:00/06:00+

Artitgels legids il pli savens