135 gardists èn per il mument en la Guardia Papala Svizra, pia è il duair emplenì. Tenor il responsabel da medias è la lavur attractiva. Dad ina vart perquai che la paja è per relaziuns talianas auta ed ils gardists han naginas autras expensas. En mintga cas saja la lavur ina experientscha speziala che resta en regurdanza.
In sguard enavos da dus gardists anteriurs
Martin Muoth era per dus onns gardist en il Vatican. El appreziescha il contact cun ils auters gardists e la buna amicizia. Il pli spezial era per el dad esser uschè datiers al Papa e savair barattar in ni l’auter pled cun el. Durant quests dus onns ha Martin Muoth vesì bleras persunas prominents ch'èn vegnids sin visita tal Papa, tranter auter la Regina da l’Engalterra u il president da l’America.
Sch’ins porta l’unifurma èn ins in magnet da turists.
Corsin Kofler è creschì si a Riom en il Surses, ì en il Vatican sco gardist ed uss stat el a Bulsaun en il Tirol dal Sid. Per el èsi stà ina gronda midada dad ir en ina metropola sco Roma, però il temp sco gardist ha el giudì fitg e questas experientschas restan per adina en sias regurdientschas. Per el èsi stà in'onur da lavurar per il Papa ed adina sch’el ha discurrì cun il Papa era quai insatge fitg spezial.
Jau prend cun mai sis bels onns che jau na vegnia mai ad emblidar.
