Siglir tar il cuntegn

Header

video
Tge munta l'exclusiun da la Russia ord il sistem da Swift?
Or da RTR Social dals 28.02.2022.
abspielen. Laufzeit 1 minuta 37 Sekunden.
cuntegn

Guerra en l'Ucraina Sancziuns cunter banca centrala russa en vigur

L’Uniun europeica (UE) ha mess en vigur la notg passada las sancziuns cunter la banca centrala russa. Tenor la presidenta da la cumissiun da l'UE Ursula von der Leyen cumpiglian quellas era in scumond da far transacziuns cun l’institut da finanzas russ. Plinavant vegnan l'entira facultad da la banca centrala russa en l’UE schelada en. Quai per impedir che la guerra dal president russ Wladimir Putin cunter l’Ucraina possia vegnir finanziada cun quels daners.

Exclusiun dal «Swift» vegn preparada

Gist sco in'ulteriura sancziun en preparaziun: da sclauder ils instituts da finanzas russ da la rait da communicaziun da bancas «Swift». Tenor il schef diplomat da l’UE Josep Borrell duai vegnir schelada circa la mesadad da la facultad da la banca centrala russa. Quai vegnia a tutgar ferm il sistem finanzial da la Russia, quinta Borrell. En preparaziun èn mesiras supplementaras, numnadamain sancziun cunter oligarchs, glieud d’affars e politichers russ. Era lur facultad vul l’UE schelar en.

Banca centrala russa sa dosta cunter rubel che croda

La banca centrala russa piglia mesiras per salvar il sistem finanzial russ da las mesiras. Uschia èsi scumandà da vender vaglia russa ch'è en possess da persunas da l'exteriur. Ultra da quai prova la banca centrala da sustegnair las bancas cun sustegn finanzial e fatschentas cun valutas estras. Tenor l'agentura da novitads Reuters è il rubel crudà la notg passada per bunamain 42%. Ultra da quai è il temp d'avertura da la bursa a Moscau reducì – ella avra 3 uras pli tard.

Mesiras era en preparaziun en Svizra

Era da la vart da la Svizra èsi da quintar cun ulteriuras mesiras. Quai suenter la sesida extraordinaria dal Cussegl federal ch'è previsa glindesdi. Tenor la televisiun da la Svizra romanda RTS ha il president da la Confederaziun Ignazio Cassis annunzià ch'ins vegnia a decider sumegliantas mesiras sco l'UE.

audio
Per tadlar las posiziuns da l'UE e da la Svizra
aus RTR Audio vom 28.02.2022.
abspielen. Laufzeit 1 minuta 52 Sekunden.

RTR novitads 06:00

Artitgels legids il pli savens

Scrollar a sanestra Scrollar a dretga