Guerra Ucraina – Russia - Odessa è vegnì attatgà or da l'aria

25 da settember

• Sin la citad da port ucranaisa Odessa hai dà attatgas cun dronas e rachetas la notg passada. Tenor rapports da medias saja stà d'udir explosiuns. A la costa saja vegnì tutgà in grond bajetg ch'haja lura piglià fieu. Davart unfrendas pussaivlas na datti naginas infurmaziuns. L'aviatica militara ucranaisa aveva avertì ordavant via Telegram d'attatgas cun dronas e rachetas. La populaziun d'Odessa e da la regiun è vegnida appellada d'ir en segirezza. Temporarmain hai dà in alarm d'aria per l'entira Ucraina.

22 da settember

• Ils Stadis Unids sustegnan l'Ucraina cun in ulteriur pachet d'agid militar da 325 milliuns francs, sco il president Joe Biden ha annunzià suenter ses inscunter cun il president ucranais Wolodimir Selenski. Il pachet d'agid vegnia a gidar l'Ucraina tar la defensiun da l'aria durant l'enviern. Entant è la probabilitad per dapli daners per l'Ucraina dals Stadis Unids vegnida pli pitschna. Ed en la populaziun èn, tenor ina enquista actuala da «CNN», 55% encunter ulteriur sustegn per l'Ucraina.

20 da settember

• La Svizra sustegn l'idea d'in tribunal spezial per ils crim da l'aggressiun cunter l'Ucraina. Quai ha ditg il cusseglier federal Ignazio Cassis a New York a chaschun d'in inscunter davart il statut da fundaziun da la curt penala internaziunala.

15 da settember

• Il Tribunal penal internaziunal ha tenor atgnas indicaziuns avert in biro en la chapitala Kiev. Quel duaja gidar a sclerir crims da guerra supponids che la Russia haja commess. Quai rapporta l’agentura da novitads tudestga DPA. La primavaira aveva il Tribunal penal internaziunal a Den Haag decretà in cumond d’arrest internaziunal cunter il president russ Wladimir Putin pervi da crims da guerra supponids. Tant la Russia, sco er la China ed ils Stadis Unids na renconuschan betg quest tribunal.

3 da settember

• Danovamain hai dà attatgas russas sin ports dal Danubi en l'Ucraina. Tenor l'aviatica militara ucranaisa sajan dus civilists vegnids blessads ed igl haja dà donn material. Ins haja sajettà giu 22 da las 25 dronas russas. Ils ports dal Danubi èn actualmain la ruta principala per exports da granezza ucranais – suenter che la Russia è sortida da la cunvegna per exports segirs. Damaun è planisà in inscunter, nua che Putin vul contractar cun il president tirc, Erdogan davart ina nova cunvegna per exports da granezza da l'Ucraina.

27 d'avust

• Las autoritads russas han confermà uffizialmain ch’il schef da la truppa da mercenaris Wagner, Jewgeni Prigoschin, è mort. Quai rapporta la  agentura da novitads Tass. Las unfrendas da la crudada d'in aviun sajan tuttas identifitgadas e Prigoschin saja ina da questas. La raschun per la crudada da l'aviun n'è anc betg sclerida uffizialmain. Bleras vuschs russas – ed era regenzas da l'exteriur – sminan ch'ins haja fatg crudar l'aviun cun intenziun. Quai dus mais suenter che Prigoschin era sa mess encunter la regenza russa – ed era vegnì titulà sco traditur dal president russ Wladimir Putin.

Legenda: Lampas illumineschan parts d'in jet privat suenter la crudada en vischinanza dal vitg da Kuzhenkino, regiun Twer, Russia. Keystone

06:23

video

Putin conferma mortori da Prigoschin

Or da 10 vor 10 dals 24.08.2023.

laschar ir. Durada: 6 minutas 23 Secundas.

24 d'avust

• Il schef da la truppa da mercenaris Wagner, Jewgeni Prigoschin, è probabel mort: En il nordvest da Moscau è in jet privat cun 10 persunas a bord crudà giu. Tenor l'autoritad russa per la segirezza da sgol saja era Prigoschin stà sin la glista da passagiers. Sco l’agentura da novitads russa Ria rapporta, n’haja dà nagins survivents. Daco che l’aviun è crudà giu, n’è anc betg enconuschent.

2 d'avust

• Dronas russas han destruì quasi 40'000 tonnas graun en ils ports da mar ucranais en la Mar Naira. Tenor las autoritads ucranaisas fiss il graun stà destinà per pajais africans, la China e l'Israel. L'armada russa aveva apparentamain attatgà la notg passada cun intenziun l'infrastructura da port da l'Ucraina. L'Ucraina è avisada sin ils ports. Quels èn decisivs per l'export da granezza sur la Mar Naira u il Danubi.

Prim d'avust

• La chapitala russa Moscau è danovamain vegnida attatgada cun dronas. Quai ha communitgà il president da la citad via Telegram. La defensiun da l’aria haja sajettà giu pliras dronas. Ina drona haja dentant donnegià la fatschada d’ina chasa auta. Indicaziuns uffizialas davart persunas blessadas na datti betg. Tenor l'agentura da novitads Tass è la plazza aviatica stada serrada temporarmain.

29 da fanadur

• La Pologna è inquietada davart ils moviments da la gruppa da Wagner en il Belarus, quai ha ditg il primminister da la Pologna Mateusch Morawiezki. La Pologna saja en possess da l'infurmaziun che dapli che 100 schuldada da la gruppa Wagner saja en moviment direcziun Grudno en il nord dal Belarus, prest al cunfin cun la Pologna. Uschia vegnia la situaziun al cunfin anc pli privlusa. La gruppa Wagner è suenter la revolta malgartegiada en la Russia, vegnida dischloccada en il Belarus ed è staziunada al cunfin da la Pologna.

25 da fanadur

• En la Russia duai la limita per l'obligatori da far servetsch militar vegnir augmentada sin 30 onns, quai ha decis la chombra gronda dal parlament, l'uschénumnada Duma. Il mument èn umens tranter 18 e 27 onns obligads da far in onn servetsch militar. Umens ch'èn obligads da far servetsch militar na dastgan tenor lescha betg vegnir engaschads en cumbats ordaifer la Russia. La regenza russa vesa quatter regiuns ucranaisas però sco ses territori. Cunquai eri vegnì fatg quitads ch'er obligads da far servetsch militar stoppian cumbatter en l'Ucraina.

24 da fanadur

• La Russia è pronta da remplazzar las furniziuns da graun da l’Ucraina. Quai ha communitgà il president russ Wladimir Putin sin la pagina d’internet dal Cremlin. E quai be paucs dis suenter che Moscau ha decis da betg prolungar la cunvegna da granezza cun Kiev. Malgrà sancziuns dal vest vegnia la Russia mantegnair las furniziuns en stadis africans. L’export da graun ucranais haja pers sia muntada umanitara, cunquai che la gronda part da las furniziuns saja ida a firmas europeicas ed americanas, ha pretendì Putin. Quai en vista a l'inscunter tranter la Russia e stadis africans a Son Petersburg.
• A Moscau èn duas dronas vegnidas sajettadas giu. Quai ha scrit il president da la chapitala sin Telegram. Persunas na sajan betg vegnidas blessadas. Er n’haja betg dà donns material pli gronds. Tocca d’ina drona saja vegnida chattada en il center e tocca da tschella en il sid da Moscau. Gia l’entschatta dal mais ha la Russia tenor atgnas indicaziuns neutralisà in’attatga da dronas sin la chapitala. Moscau fa responsabel l’Ucraina per las attatgas. Kiev n’ha fin uss betg prendì posiziun en chaussa.

22 da fanadur

• Sin la peninsla Crim ch’è occupada da la Russia è in deposit da muniziun vegnì attatgà ed ha tschiffà fieu. Quai han las autoritads localas da la Crim communitgà. Il traffic da viafier saja interrut. Ins haja appellà a la populaziun da bandunar la regiun. Era il traffic sin la punt da la Crim è entant vegnì bloccà. La raschun per quai n’han las autoritads però betg communitgà. La punt colliescha la terra ferma russa cun la peninsla. L’entschatta da l’emna ha in’explosiun donnegià la punt da la Crim.

19 da fanadur

• La notg è la citad da port ucranaisa Odessa danovamain vegnida attatgada or da l'aria. Tenor medias localas èn stadas d'udir explosiuns, la defensiun da l'aria saja stada activa. Er durant las attatgas duain las lavurantas ed ils lavurants en il port d'Odessa cuntinuar cun lur lavur, ha ditg il pledader da l'administraziun militara Odessa. La Russia emprova da far tema a quels che lavuran per il corridor da graun. En il fratemp vegn appellà a la populaziun da star davent da fanestras.

18 da fanadur

• La cunvegna da graun tranter la Russia e l’Ucraina è scadida uffizialmain glindesdi saira. Uss vul il president ucranais Wolodimir Selenski cuntinuar la cunvegna, e quai senza il consentiment da Moscau. El haja prendì si contact cun il secretari da l'ONU António Guterres ed il president tirc Recep Tayyip Erdogan, uschia Selenski.
• L’aviatica militara russa ha attatgà la notg passada la citad da port Odessa en l’Ucraina. Tenor atgnas indicaziuns ha l’armada ucranaisa sajettà giu sis missils da cruschada e 21 dronas da cumbat russas. Tuttina haja dà donns al port e vi da bajetgs pervi da tocca crudada pervi da l’unda da pressiun. Ier ha la Russia laschà scader la cunvegna da granezza cun l’Ucraina. Grazia a quella ha l’Ucraina pudì exportar graun da ports en la Mar Naira, per gronda part dal port d’Odessa.

17 da fanadur

• Oz baud la damaun hai dà in'explosiun sin la punt che collia la Peninsla da la Crim direct cun la Russia. Maletgs publitgads sin in chanal da Telegram mussan ina part da la punt donnegiada. La colliaziun da viafier na saja betg pertutgada inditgeschan las autoritads russas. La Russia fa responsabla l'Ucraina per l'attatga. Tenor l'armada ucrainaisa pudessi esser ina provocaziun russa. Tut questas indicaziuns na sa laschan betg verifitgar a moda independenta.
• L’Ucraina na dastga betg pli exportar graun da ports en la Mar Naira. La Russia haja sistì la cunvegna vertenta. Quella possia pir puspè vegnir prolungada, sche tut las pretensiuns russas per l’export da ses agen graun sajan ademplidas, citescha l’agentura da novitads Tass il Cremlin.

12 da fanadur

• Il settember passà hai dà explosiuns vi da las lingias da gas sutmarinas Nord Stream tranter la Russia e la Germania. Uss han experts chattà fastizs da material explosiv sin ina bartga suspectusa. Quai scrivan la Germania, la Svezia ed il Danemarc en ina brev cuminaivla al Cussegl da segirezza da l'ONU. Il suspect saja che la bartga haja servì per transportar material explosiv. Vitiers haja la persuna ch'haja prendì si la bartga zuppentà sia identitad. Sfunsaders scolads pudessian avair fixà il material explosiv vi da las lingias da gas.