- Il servetsch da novitads curtas Twitter è vegnì attatgà la mesemna saira a l'engronda.
- Pertutgads èn tranter auter l'anteriur president american Barack Obama, il fundatur da Microsoft Bill Gates ed il rappunz Kayne West, ma er firmas il concern da tecnologia Apple u il servetsch da transport Uber.
- Twitter ha confermà l'attatga e retschertga, tge ch'è capità.
A nunenconuschents eri reussì da malduvrar la mesemna saira profils da divers prominents e grondas firmas americanas tar Twitter. Igl è vegnì plazzà reclama per affars dubius cun valurs da cripto. La reclama era vegnida decorada cun annunzias dals promis, da vulair dar raps.
Messadis pli che dubius
Uschia era cumparì per exempel sin il profil verifitgà dal fundatur da Microsoft Bill Gates quest messadi dubius: «Tuts ma dumondan adina, da dar enavos insatge, ed uss è vegnì il temp per quai. Jau redublesch tut ils pajaments, che vegnan fatgs durant las proximas 30 minutas sin mia adressa da bitcoin. Vus ma tramettais 1000 dollar ed jau tramet enavos a Vus 2000 dollar.»
Blers profils eran suenter vegnids serrads temporarmain per cumparair puspè senza ils messadis dubius. Co che quai ha pudì capitar n'è anc betg enconuschent.
Problems gea – ma betg en questa dimensiun
Twitter aveva gia inqual giada problems cun profils rapinads – dentant anc mai cun tants profils e cun persunas talmain prominentas. Grazia a la reclama dubiusa sajan arrivads passa 10 milliuns dollars tar ils hackers, fan a savair pliras medias.
Tenor observaders sa tractia da l'attatga da hackers la pli gronda en l'istorgia da las medias socialas. Intgins dals experts supponan che in'attatga da questa dimensiun saja be pussaivla cun savair datas internas da Twitter sez. Il schef da Twitter, Jack Dorsey ha empermess dad infurmar detagliadamain, uschespert ch'ins sappia pli cler, tge che saja capità.