Diesch onns suenter il ferm terratrembel a Haiti han millis da persunas commemorà las 200'000 unfrendas. Il president da Haiti, Jovenel Moïse, ha mess giu in tschupè tar in monument datiers da la chapitala da Port-au-Prince. Era diplomats esters ed auts funcziunaris han prendì part a la ceremonia.
Blers vivan anc adina en alloschis d'urgenza
Ils 12 da schaner 2010 avevi dà a Haiti in terratrembel cun ina fermezza da 7,0. Passa 200'000 persunas avevan pers lur vita e passa 300'000 persunas eran vegnidas blessadas. Passa 1,5 milliuns persunas han pers lur dachasa tras il terratrembel. Bleras dad ellas vivan anc oz en alloschis d’urgenza. Tras ina epidemia da cholera ch'era succedida sin il terratrembel, èn ulteriuras millis persunas mortas.
Era 10 onns suenter il terratrembel è il stadi da la Caribica fitg pauper anc adina dependent dad agid internaziunal. Gnanc la chapitala dal Haiti, Port-au-Prince è puspè reconstruida dal tut.
Situaziun problematica
Ed er politicamain è la situaziun difficila. Adina puspè datti protests. La regenza vegn adina puspè messa en connex cun afferas da corrupziun. Dasperas ha ina gronda part da la populaziun strusch avunda per surviver.
RTR novitads 06:00