Siglir tar il cuntegn
cuntegn

Exteriur Hariri vul turnar en il Libanon

L'anteriur schef da la regenza dal Libanon, Saad al-Hariri vul turnar en curt en sia patria. Quai ha el ditg la sonda suentermezdi a Paris suenter in discurs cun il president franzos Emmanuel Macron. Il schef demissiunà da la regenza libanaisa Saad Hariri era arrivà la bun'ura en Frantscha.

Els dus davant porta da l'Elysées.
Legenda: Saad Hariri ed Emmanuel Macron tar lur inscunter la sonda a Paris. Keystone

Saad Hariri ha annunzià da viagiar ils proxims dis enavos en il Libanon e sa declerar al president da stadi Michel Aoun.

Hariri ha engrazià ad Emmanuel Macron suenter l'inscunter a Paris er via Twitter:

Er Emmanuel Macron scriva sin Twitter da l'inscunter cun Hariri:

Aoun aveva annunzià la bun'ura, che Hariri vegnia spetgà la mesemna proxima en il Libanon per il di da l’independenza. El n'acceptia betg la demissiun uscheditg che Hariri na turnia betg en il Libanon e decleria ad el ils motivs per ses pass.

La demissiun da Hariri era ina gronda surpraisa

Hariri aveva annunzià avant duas emnas fitg surprendentamain davent da l’Arabia Saudita da demissiunar sco schef da la regenza libanaisa. Quai pervi da tema dad in attentat. Dapi lura n’aveva el betg pli bandunà la regiun dal Golf.

Sin envid dal president franzos Macron è Hariri viagià a Paris.

Arabia Saudita veglia destabilir il Libanon

Questa demissiun surprendenta ha fatg specular ils observaders enturn il mund: Uschia vegniva supponì che l’Arabia Saudita haja sfurzà a Hariri da demissiunar per svegliar agitaziuns cun la milissa schiita pussanta Hisbollah.

RR novitads 16:00