Tenor rapports da la gasetta Bild è Kohl mort il venderdi en damaun en sia chasa a Ludwigshafen. Helmut Kohl è sta chanzelier dal 1982 fin il 1998 e cun quai il pli ditg en uffizi da tut ils chanzeliers tudestgs. Dal 1973 fin il 1998 ha Helmut Kohl presidià la CDU, nua ch'el è già entrà sco scolar.
Il bab da l'unitad tudestga
Ch'il mir è crudà ils 9 da november 1989 e che la Germania è vegnida reunida silsuenter è il pli grond merit da Helmut Kohl. Sias amicizias cun Michail Gorbatschow, George Bush, François Mitterand ed auters partenaris ein stadas la basa per l'unitad tudestga. Ils 2 da december 1990 è Helmut Kohl vegnì elegì sco emprim chancelier da la Germania reunida.
En ses temp sco chancelier ha Kohl sanà las finanzas statalas e sbassà la taglia. Fin l'onn 1989 è il dumber d'occupads creschì per 1,3 milliuns. Suenter la crudada dal mir è sia regenza cunzunt stada sut l'esaina da manar ensemen l'economia, il sozialesser ed era emoziunalmain ils 16 stadis federals tudestg. Quai n'è betg adina stà simpel. Er l'introducziun da l'euro han ins decidì sut Helmut Kohl sco chancelier ed el vala sco piunier da l'Uniun europeica.
L'affera da donaziuns
Durant ils onns 90 ha el promovì la chanceliera actuala Angela Merkel entaifer la partida ed er en la regenza. La relaziun dad Angela Merkel e Helmut Kohl è però restada fin la fin trublada pervi da l'affera da donaziuns. Helmut Kohl ha refusà da numnar ils nums da persunas che avevan dà ad el 1,5 milliuns marc ch'el n'aveva betg declerà.
Sco secretaria generala da la partida ha Angela Merkel lura appellà la fin dals onns 90 da sa separar da Helmut Kohl sco surbab. 1998 ha la CDU lura pers las elecziuns en il Bundestag e cunquai è la regenza da 16 onns da Helmut Kohl ida a fin.
Onuraziuns da l'entir mund
Presidents e schefs da regenza da l'entir mund han onurà ils merits da l'anteriur chancelier tudestg sco grond european. Il president american Donald Trump ha condolà e ludà la colliaziun da Kohl cun ils Stadis Unids.
L'anteriur schef da l'Uniun sovietica Michail Gorbatschow ha accentuà il merits da Helmut Kohl en connex cun la reuniun da la Germania. La chanceliera actuala Angela Merkel ha ditg che quai saja stà «art politic» sin il pli aut nivel en favur da l'umanitad e da la pasch.
Ed era la presidenta da la Confederaziun, Doris Leuthard, ha ditg che Kohl vegnia a restar nunemblidaivels sco chancelier da la reuniun e da la pasch.
Reacziuns sin Twitter
RR novitads 18.00