Schmidt è stà dal 1974 fin il 1982 chancelier tudestg, quai sco successur da Willy Brandt. Sco chancelier è el stà confruntà tranter auter cun la crisa da l'ieli dals onns 70, e cun il cumbat cunter il terrorissem da la RAF, la «Rote Armee-Fraktion».
Dapi il 1983 è Schmidt stà coeditur da la gasetta emnila «Die Zeit». El ha scrit numerus cudeschs ed ha tegnì blers referats.
Undrà sur ils cunfins da las partidas
La chanceliera tudestga Angela Merkel ha numnà Helmut Schmidt in visiunari da la collavuraziun internaziunala. Ed il president da la Germania Joachim Gauck ha declerà che Schmidt saja stà in dals pli impurtants politichers suenter la guerra, e numnà Schmidt in um dal fatg, dal patratg cler e dal pled avert. Il minister da l'exteriur tudestg Frank-Walter Steinmeier la finala ha punctuà, quant fitg che Schmidt haja marcà la Germania.
RR novitads