- En la citad tudestga Hanau èn 11 persunas vegnidas mazzadas en dus differents lieus entras sajets.
- Tranter ils morts saja il delinquent probabel ch'ins haja chattà en si'abitaziun, ha communitgà la polizia.
- I na dettia nagins indizis sin ulteriurs delinquents.
- Motivs rassistics èn probabel davostiers.
En la citad tudestga da Hanau èn 11 persunas vegnidas mazzadas tar plirs sajettims. Tranter quellas er l'attentader probabel. Pliras ulteriuras persunas sajan vegnidas blessadas. Quai ha communitgà la polizia.
Tenor medias localas saja vegnì sajettà enturn ier saira davant duas bars. Oz a bun'ura ha la polizia chattà en in'abitaziun la bara da l'attentader probabel e d'in'autra persuna. I sa tractia d'in um tudestg da 43 onns. El haja sajettà giu en la citad nov persunas e lu en si'atgna abitaziun sia mamma e lura sasez, scriva la polizia. Sco i para ha el agì ord motivs rassistics. Tranter las unfrendas sajan pliras persunas cun biografia da migraziun.
Il suentermezdi vul la procura publica infurmar.
Hanau è en il Bundesland Hessen, radund 20 kilometers en l’ost da Frankfurt. La citad ha radund 100'000 abitants.
RTR novitads 07:00