Siglir tar il cuntegn

Exteriur Hillary Clinton gudogna era en la chapitala

Las pre-elecziuns dals democrats a Washington gudogna l’anteriura ministra dal exteriur americana Hillary Clinton. Tenor las medias americanas è ella clera avant Bernie Sanders. Uss èn las pre-elecziuns dals democrats a fin.

Hillary Clinton.
Legenda: Hillary Clinton aveva gia avant las pre-elecziuns a Washington avunda vuschs per ina nominaziun. Keystone

Suenter che bun duas terzas da las vuschs èn dumbradas survegn Hillary Clinton en la chapitala Washington 79% da las vuschs, Bernie Sanders vegn sulet sin 21%.

Clinton aveva gia avant las elecziuns a Washington avunda vuschs da delegads per ina probabla nominaziun. L’uffiziala nominaziun duai alura succeder al di da partida dals democrats il fanadur.

Sanders sa retira el uss?

La dumonda sch’il cuntracandidat da Clinton Bernie Sanders sa retira uss n’è betg respundida. Sche Sanders sa retira sco candidat alura fissi pussaivel a ses delegads er d’eleger Clinton al di da partida.

Anc avant ina emna aveva Sanders dentant annunzià da vulair restar vinavant candidat per cumbatter vinavant per ina giustia sociala. Tuttina ha el annunzià da vulair cooperar cun Clinton, quai surtut per impedir ina elecziun dal republican Donald Trump.

RR novitads 06:00