Hillary Clinton aveva gia cuntanschì il dumber da delegads necessari per daventar candidata per il presidi american cun victorias a New Jersey, New Mexico e South Dakota. Uss dovra ella mo pli anc intginas vuschs dals uschè numnads super-delegads per esser segira da l’elecziun al di da partida dals democrats il fanadur. Gia tschients da super-delegads han sincerà da vulair sustegnair Clinton.
“Jau sun candidata”
Gia la mesemna en damaun aveva Hillary Clinton declerà sco victura, suenter avair gudagnà a New Jersey. I saja l'emprima giada en l'istorgia dal pajais, ch'ina dunna vegnia ad esser la candidata d'ina gronda partida, ha Clinton ditg. L’anteriura ministra da l’exteriur è sa preschentada a New York a millis d’aderents che han celebrà ella.
Bernie Sanders na ceda betg
La schanza per il concurrent Bernie Sanders da trair avunda super-delegads da sia vart è fitg pitschna. El ha gudagnà il mardi las pre-elecziuns a North Dakota ed a Montana. Tuttina na vul el betg ceder. El veglia cuntinuar ses cumbat electoral cun la finamira da gudagnar la pre-elecziun en il stadi federativ da Washington. Quai ha Sanders ditg en la citad da Santa Monica en la California.
RR novitads 06:00/09:00
