Siglir tar il cuntegn

Header

cuntegn

Hiroshima Guterres tema ina cunfruntaziun atomara

Las pussanzas atomaras duain s’obligar da betg utilisar lur armas nuclearas sco emprim, pretenda Antonio Guterres, il secretari general da las Naziuns unidas, tar ina conferenza da pressa a Tokio. Il privel d’in conflict atomar saja suenter decennis puspè qua. Era sajan attatgas sin ovras atomaras suicidalas – areguard las attatgas actualas a Saporischschja en l’Ucraina.    

A memoria da Hiroshima

Cun in appel a la pasch e da dismetter tuttas armas atomaras è la citad giapunaisa Hiroshima sa regurdada da la bumba atomara ch'è vegnida bittada giu avant 77 onns dals Americans.

Las 08:15 temp local èn pliras 10'000 persunas sa radunadas per ina minuta da silenzi. Er part da la ceremonia en il «Parc da la pasch» ha fatg il secretari general da l’ONU, António Guterres. El ha avertì d’in rearmament suenter l’invasiun da la Russia en l’Ucraina. Armas atomaras sajan absurdas. Ella na garanteschian betg segirezza, sulettamain mort e destrucziun. Ins stoppia sa dumandar tge che l’umanitad haja emprendì dal bulieu atomar che saja vegnì sur questa citad ils 6 d’avust 1945. L'umanitad fetschia termagls cun in'arma chargiada – uschia Guterres vinavant.

A Hiroshima eran radund 70'000 persunas mortas immediat pervi da la bumba. Anc ina giada tantas èn mortas fin la fin da l’onn. Anc oz moran umans vid las consequenzas tardivas da la bumba atomara. Trais dis pli tard han ils Americans bittà giu ina segunda bumba atomara sin la citad da Nagasaki. Curt suenter ha il Giapun capitulà e la Segunda Guerra mundiala è stada a fin.

Or da l'archiv

audio
Il 2015 èsi stà 70 onns dapi che la bumba atomara ha destruì la citad
ord Il chavazzin dal di dals 06.08.2015.
laschar ir. Durada: 3 minutas 33 Secundas.

RTR novitads 12:00

Artitgels legids il pli savens

Scrollar a sanestra Scrollar a dretga