Siglir tar il cuntegn

Exteriur HIV sa derasa puspè – ONU avertescha

Suenter gronds success en il cumbat cunter HIV s’avanza l’infecziun virala puspè en l’Europa da l’Ost ed en autras parts dal mund. I dovria là cleramain pli fermas stentas che fin uss, averteschan las Naziuns Unidas.

Mauns che tegnan bindels cotschens, il simbol per il cumbat cunter aids.
Legenda: Passa in milliun umans mora mintg'onn dal virus HI che chaschuna aids. Keystone

En l'Europa da l'Ost ed en autras parts dal mund avanza il virus da HIV puspè pli ferm. Là sajan stentas pli grondas che fin ussa necessarias, ha avertì il directur dal program d'anti-aids da l'ONU Michel Sidibé.

Cifras na tschessan betg dapi 2010

Tenor il nov rapport n’èn las cifras d’infecziun en media mundiala betg pli sa reducidas dapi il 2010. Suenter il punct culminant dal 1997 eran las cifras silsuenter sa reducidas per 40%. Mintg’onn s’infecteschan dapi il 2010 radund 1,9 milliuns persunas cun il virus che chaschuna aids.

Mundialmain bunamain 37 milliuns cas

Tranter il 2010 ed il 2015 èn las infecziuns da HIV s'augmentadas il pli ferm en l'Europa da l'Ost ed en l'Asia Centrala cun mintg'onn 57%. En l'Europa dal Vest e l'Europa Centrala è il dumber da las novas infecziuns sa reducì levamain.

In grond success saja il fatg che la derasaziun da HIV sin uffants saja sa reducida per 70% dapi il 2001. Il 2015 vivevan mundialmain total 36,7 milliuns persunas cun HIV. 1,1 milliuns persunas èn mortas l’ultim onn dal virus.

RR novitads 18:00