Siglir tar il cuntegn

Header

cuntegn

I manca be pli l'Ungaria Parlament tirc approva l'adesiun da la Svezia a la Nato

Suenter sastrair politicamain per in onn e mez ha il parlament tirc approvà l'adesiun da la Svezia en la Nato. 287 parlamentaris han vuschà mardi saira ad Ankara persuenter, 55 èn stads encunter, 4 deputads èn s'abstegnids da la vusch. Ussa sto anc il president Recep Tayyip Erdogan suttascriver l'uschenumnà protocol d'adesiun, quai che vala sco tant sco segir. Sch'el terminescha la ratificaziun en curt temp, resta dentant da spetgar. Suenter la suttascripziun dad Erdogan vegn il conclus publitgà en il fegl uffizial. Silsuenter sto be pli l'Ungaria acceptar l'adesiun da la Svezia. Tut ils auters 29 pajais alliads han gia fatg quai. Il prim-minister ungarais, Victor Orban, ha envidà il schef da regenza svedais, Ulf Kristersson ad in discurs.

Finlanda gia commember

En vista a la guerra d’attatga russa cunter l’Ucraina aveva la Svezia dumandà il matg 2022 ensemen cun la Finlanda la commembranza a la Nato. La Finlanda è vegnida beneventada l’entschatta d’avrigl da l’onn passà sco 31avla commembra da l’allianza.

Erdogan aveva collià il consentiment da ses pajais tranter auter a furniziuns d'aviuns da cumbat or dals Stadis Unids. Fin ussa manca dentant vinavant il consentiment dal congress american en chaussa.

La Tirchia aveva ultra da quai er adina puspè motivà sia bloccada cun la mancanza d'acziuns da la Svezia cunter «organisaziuns da terror». En quest connex sa tractia cunzunt da la partida da lavurers curds scumandada PKK e da la milissa curda siriana YPG. La regenza a Stockholm aveva reagì sin las pretensiuns da la Tirchia cun leschas antiterror pli severas.

Erdogan aveva annullà ses veto dals onns passads e preschentà al parlament il protocol d'adesiun da la Nato la fin d'october per la ratificaziun. Sche la glisch verda d'Ancara penda ussa vi da concessiuns en tractativas davart affars d'armaziun n'è betg cler.

RTR novitads 22:00

Artitgels legids il pli savens