A Strasbourg hajan omadus politichers suttastritgà ch'i dovria ina schliaziun per l'entir'Europa en chaussa - ha ditg in pledader d'Hollande. Prioritad haja il plan d'acziun che la cumissiun da l'UE aveva fixà.
Quel prevesa tranter auter da gidar la Grezia da controllar ses cunfins. Ultra da quai duaja in pachet d'agid gidar la Tirchia da reducir il dumber da fugitivs ch'arrivian en l'Europa.
Per discutar la cumpart da la Tirchia sa scuntra Merkel oz gliendisdi cun ils manaders politics da la Tirchia ad Ankara. A bun’ura sa scuntra ella cun il primminister Ahmet Davutoglu, suenter cun il schef da stadi Recep Tayyip Erdogan.
La Tirchia ha ina rolla da clav en las crisa da fugitivs, cunquai ch’ella è il pajais da transit central sin lur ruta.
Critica da Merkel envers Russia
Merkel ha crititgà vehementamain la Russia ed il reschim en la Siria pervi da lur las attatgas ord l'aria sin la citad siriana Aleppo. La dolur umana entras ils bumbardament saja in orrur, ha ditg Merkel a sia visita en la Tirchia.
La Germania e la Tirchia pretendan che la Russia sa tegnia vid la resoluziun da l'ONU che sa drizza cunter attatgas sin civilists. Vitiers vulan ils dus pajais s'engaschar, per che la NATO sa participeschia da cumbatter ils deportaders en la mar tranter la Tirchia e la Grezia.
Tirchia defenda lur cumbat cunter PKK
Il primminister tirc Ahmet Davutolu refusa ch'auters pajais sa maschaidan en il cumbat cunter la partida curda scumandada PKK.
I na dettia nagin pajais che tolereschia activitads terroristicas aifer ses cunfins, ha ditg Davutolu suenter in inscunter cun la chanceliera tudestga Angela Merkel ad Ankara. Sco pajais democratic haja la Tirchia il dretg d'agir cunter cumbattants da la PKK.
Pajais da l'UE crititgeschan adina puspè la Tirchia: ella haja mancanzas tar il stadi da dretg e tar la libertad da las medias.
RR novitads 07:00 / 15:00 / 18:00