Siglir tar il cuntegn

Header

David Bowie durant in concert a Vienna avant var 16 onns.
Legenda: David Bowie durant in concert a Vienna avant var 16 onns. Keystone
cuntegn

Exteriur Il chantadur David Bowie è mort

Suenter avair cumbattì durant 18 mais cunter cancer, è il chantadur e musicist englais David Bowie mort en la vegliadetgna da 69 onns.

La mort da Bowie è vegnida annunziada sin sia pagina da facebook. El saja mort paschaivlamain, circumdà da ses cunfamigliars. E confermà questa novitad ha ses figl Duncan sin twitter:

Durant sia carriera ch’ha cumenzà avant 50 onns, ha David Bowie publitgà blers albums. In dals pli enconuschents è «Let’s Dance» dal 1983, cun il hit «China Girl». Auters tocs bain enconuschents èn «Heroes» u «Ashes To Ashes». Avant in’emna è cumparì ses davos album «Blackstar».

Dasperas ha David Bowie era giugà en differents films sco «The Man Who Fell to Earth». Quest film a furmà la basa dal toc da teater «Lazarus» che vegn giugà actualmain al Broadway, e Bowie è stà coautur da quest toc.

Consternaziun tar musicists e prominents

Il musicist american Kayne West ha scrit sin twitter, che David Bowie saja stà ina da sias pli grondas inspiraziuns, uschè curaschus, uschè creativ. E la chantadura Cher ha manegià ch’ina legenda haja bandunà quest mund.

audio
Mezdi: La mort da David Bowie è ina surpraisa
ord Actualitad dals 11.01.2016.
laschar ir. Durada: 5 minutas 19 Secundas.

Ruaussa en pasch, ha scrit sin twitter la musicista Regina Spektor. Ella saja cuntenta che Bowie saja stà qua sin il mund.

RR Novitads 09:00/10:00

Artitgels legids il pli savens

Scrollar a sanestra Scrollar a dretga