Siglir tar il cuntegn

Header

cuntegn

Exteriur Il Öræfajökull è sa dasdà

En l'Islanda pudessi danovamain dar in'erupziun vulcanica. Geologs han quest onn constatà dapli activitads seismicas. Cunzunt en la regiun dal vulcan Öræfajökull sajan vegnids registrads blers terratrembels pli flaivels. Quai èn in segn ch'il vulcan «sa dasda».

Il scienziads èn perina: I dettia segns per il resvegl dal vulcan. Il november sajan vegnidas mesiradas grondas quantitads d'aua da glatsch dal glatscher che cuvra il vulcan. Quai munta che la temperatura dal vulcan haja s'augmentada, uschia il geofisicher Magnús Tumi Guðmundsson da la Universitad islandaisa.

Il termin vegn ad esser ina surpraisa

Ils scienzads supponan, ch'il magma saja fluì en las ragischs dal vulcan: Quai possia manar ad in'erupziun. Cura ch'il vulcan vegnia ad erumper – en in per mais ni pir en in insaquants onns – na sappian els dentant betg prevair. Els prendian dentant serius la chaussa, garantescha il geofisicher Guðmundsson.

Il glindesdi proxim han las autoritads envidà la populaziun ad in'infurmaziun. Ellas vulan infurmar la glieud da las consequenzas en cas d'ina erupziun. Cunquai ch'il Öræfajökull è era ina destinaziun turistica populara, ha l'autoritad elavurà in plan d'evacuaziun.

Il Öræfajökull ha durmì ditg

En ils davos milli onns è il vulcan erut duas giadas. Ina giada il 1362 e l'autra giada bun radund 350 onns pli tard, il 1727.

Erupziuns da vulcans chaschunan adina puspè er difficultads per il traffic aviatic. Uschia er l'ultim vulcan ch'era erut in l'Islanda: Il vulcan Eyjafjallajökull l'onn 2010.

La tschendra da quest'erupziun era sa derasada en furma da tschajera sur l'entira Europa dal Nord – e quai ha bloccà il traffic aviatic en tut la regiun. La tschajera vulcanica è numnadamain uschè spessa, ch'ella savess rumper ils motors dals aviuns.

RR novitads 06:00

Artitgels legids il pli savens